Pressure Cooker - پریشر ککر

صدیق سالک نے ایک "نوجوان آرٹسٹ" کے کردار کے روپ میں اپنا آئیڈیل کردار پیش کیا ہے جیسا کہ ان کی کتاب "سلیوٹ" پڑھ کر اندازہ ہوتا ہے۔ اس ناول کا یہ نوجوان ایک غریب گھرانے سے پروان چڑھنے والا ایک فلسفی مصور ہے جو معاشرے کی صحیح تصویر اپنے کینوس پر دکھانا چاہتا ہے مگر معاشرے کے سب طبقات اس کے دشمن ہیں جو اس پر طرح طرح کے مصائب کا سبب بنتے ہیں۔ حتی کہ اس کی رفیقہ حیات کو اس کا ساتھ دینے کو تیار نہیں۔ حالات کے اسی گرداب میں ایک عرصے تک پیچ و تاب کھاتے رہنے کے بعد بالآخر یہ دماغی توازن کھو بیٹھتا ہے اور گھر سے غائب ہو جاتا ہے۔ ناول کا آئیڈیا انوکھا سا ہے اگرچہ کہانی روایتی انداز کی ہے۔ بلا وجہ کی تفصیلات اور طوالت بھی نہیں ہے تاہم کچھ جگہ زیادہ ہی اختصار ہے۔ ناول کا نام بھی کچھ دل میں اترنے والا نہیں ہے نہ ہی سرورق پر کچھ محنت کی گئی ہے۔